ਔਰਤ ਨੇ ਲਾਏ ਹਰਦੁਆਰ ਦੇ ਪੰਚਾਇਤੀ ਨਿਰੰਜਣੀ ਅਖਾੜੇ ਦੇ ਮਹਾਮੰਡਲੇਸ਼ਵਰ ਵੈਰਾਗਿਆਨੰਦ ਉੱਪਰ ਬਲਾਤਕਾਰ ਦੇ ਦੋਸ਼
ਹਰਦੁਆਰ ਦੇ ਪੰਚਾਇਤੀ ਨਿਰੰਜਣੀ ਅਖਾੜੇ ਦੇ ਮਹਾਮੰਡਲੇਸ਼ਵਰ ਵੈਰਾਗਿਆਨੰਦ ਉਰਫ ਮਿਰਚੀ ਬਾਬਾ ‘ਤੇ ਇੱਕ 28 ਸਾਲਾ ਔਰਤ ਨੇ ਦੋਸ਼ ਲਾਏ ਹਨ ਕਿ ਬਾਬੇ ਨੇ ਦਵਾਈ ਨਾਲ ਬੱਚਾ ਕਰਵਾ ਦੇਣ ਦੇ ਝਾਂਸੇ ‘ਚ ਲੈ ਕੇ ਉਸ ਨੂੰ ਨਸ਼ੀਲੀ ਦਵਾਈ ਦੇ ਕੇ ਉਸ ਨਾਲ ਬਲਾਤਕਾਰ ਕੀਤਾ। ਜਦ ਉਸਨੂੰ ਹੋਸ਼ ਆਈ ਤਾਂ ਬਾਬਾ ਕਹਿੰਦਾ, “ਬੱਚਾ ਇੰਝ ਹੀ ਹੁੰਦਾ”।ਕਾਂਗਰਸੀ ਆਗੂ ਦਿਗਵਿਜੈ ਸਿੰਘ ਅਤੇ ਕਮਲ ਨਾਥ ਦੇ ਕਰੀਬੀ ਬਾਬੇ ਨੂੰ ਜਦ ਪੁਲਿਸ ਗ੍ਰਿਫਤਾਰ ਕਰਕੇ ਲਿਜਾ ਰਹੀ ਸੀ ਤਾਂ ਉਸਨੇ “ਇਨਕਲਾਬ ਜ਼ਿੰਦਾਬਾਦ” ਦੇ ਨਾਅਰੇ ਲਾਉਂਦਿਆਂ ਕਿਹਾ ਕਿ ਮੈਨੂੰ ਰਾਜਨੀਤੀ ਤਹਿਤ ਫਸਾਇਆ ਜਾ ਰਿਹਾ ਹੈ।
-ਗੁਰਪ੍ਰੀਤ ਸਿੰਘ ਸਹੋਤਾ । ਸਰੀ । ਚੜ੍ਹਦੀ ਕਲਾ
ਮੱਧ ਪ੍ਰਦੇਸ਼ ਦੇ ਸੀਨੀਅਰ ਕਾਂਗਰਸੀ ਨੇਤਾਵਾਂ ਦੇ ਕਰੀਬੀ ਮਿਰਚੀ ਬਾਬਾ ਨੂੰ ਪੁਲਿਸ ਨੇ ਬਲਾਤਕਾਰ ਦੇ ਦੋਸ਼ ਵਿੱਚ ਗ੍ਰਿਫ਼ਤਾਰ ਕਰ ਲਿਆ ਹੈ। ਮਿਰਚੀ ਬਾਬਾ ‘ਤੇ ਇਕ ਔਰਤ ਨੇ ਬਲਾਤਕਾਰ ਦਾ ਦੋਸ਼ ਲਗਾਇਆ ਸੀ। ਔਰਤ ਦਾ ਦੋਸ਼ ਹੈ ਕਿ ਉਹ ਬੱਚਾ ਨਾ ਹੋਣ ਦੀ ਸਮੱਸਿਆ ਲੈ ਕੇ ਬਾਬੇ ਕੋਲ ਪਹੁੰਚੀ ਸੀ। ਜਿੱਥੇ ਉਸ ਨੂੰ ਨਸ਼ੀਲਾ ਪਦਾਰਥ ਖੁਆ ਕੇ ਬੇਹੋਸ਼ ਕਰ ਦਿੱਤਾ ਗਿਆ।
ਦੱਸ ਦੇਈਏ ਕਿ ਮਿਰਚੀ ਬਾਬਾ ਨੂੰ ਕਮਲਨਾਥ ਦੀ ਅਗਵਾਈ ਵਾਲੀ ਕਾਂਗਰਸ ਸਰਕਾਰ ਵਿੱਚ ਮੰਤਰੀ ਦਾ ਦਰਜਾ ਪ੍ਰਾਪਤ ਸੀ। ਮਹਿਲਾ ਦੇ ਇਲਜ਼ਾਮ ਤੋਂ ਬਾਅਦ ਭੋਪਾਲ ਪੁਲਿਸ ਦੀ ਟੀਮ ਬੀਤੀ ਰਾਤ ਯਾਨੀ 9 ਅਗਸਤ ਦੀ ਰਾਤ ਨੂੰ ਗਵਾਲੀਅਰ ਪਹੁੰਚੀ, ਜਿੱਥੇ ਬਾਬਾ ਨੂੰ ਸਵੇਰੇ ਇੱਕ ਹੋਟਲ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ।
ਬਲਾਤਕਾਰ ਦਾ ਇਲਜ਼ਾਮ ਲਗਾਉਣ ਵਾਲੀ ਮਹਿਲਾ ਪੀੜਤਾ ਰਾਏਸੇਨ ਦੀ ਰਹਿਣ ਵਾਲੀ ਹੈ। ਉਸ ਨੇ ਸ਼ਿਕਾਇਤ ਵਿੱਚ ਦੱਸਿਆ ਹੈ ਕਿ ਉਸ ਦੇ ਵਿਆਹ ਨੂੰ ਚਾਰ ਸਾਲ ਹੋ ਗਏ ਸਨ ਪਰ ਬੱਚੇ ਨਹੀਂ ਸਨ। ਇਹੀ ਕਾਰਨ ਸੀ ਕਿ ਉਹ ਮਿਰਚੀ ਬਾਬਾ ਦੇ ਸੰਪਰਕ ਵਿੱਚ ਆਈ ਸੀ।ਪੀੜਤ ਨੇ ਦੱਸਿਆ ਕਿ ਜਦੋਂ ਉਸ ਨੇ ਬਾਬਾ ਨੂੰ ਆਪਣੀਆਂ ਸਮੱਸਿਆਵਾਂ ਦੱਸੀਆਂ ਤਾਂ ਉਸ ਨੇ ਪੂਜਾ-ਪਾਠ ਕਰਨ ਨਾਲ ਬੱਚੇ ਹੋਣ ਦਾ ਦਾਅਵਾ ਕੀਤਾ।
ਧਾਰਮਿਕ ਗੁਰੂ ਮਿਰਚੀ ਬਾਬਾ ਹਰਿਦੁਆਰ ਦੇ ਸ਼੍ਰੀ ਪੰਚਾਇਤੀ ਨਿਰੰਜਨੀ ਅਖਾੜੇ ਦੇ ਮਹਾਮੰਡਲੇਸ਼ਵਰ ਸਵਾਮੀ ਵੈਰਾਗਿਆਨੰਦ ਗਿਰੀ ਮਹਾਰਾਜ ਹਨ। ਕੁਝ ਦਿਨ ਪਹਿਲਾਂ ਹਿੰਦੂ ਦੇਵੀ-ਦੇਵਤਿਆਂ ‘ਤੇ ਫਿਲਮਾਂ ਬਣਾਉਣ ਵਾਲਿਆਂ ਦੇ ਸਿਰ ਵੱਢਣ ਵਾਲਿਆਂ ਨੂੰ ਇਨਾਮ ਦੇਣ ਦਾ ਐਲਾਨ ਕੀਤਾ ਗਿਆ ਸੀ।
